Joy Isi Bewaji

Joy Isi Bewaji (dem bon am on June 8, 1977) na Nigerian raita wey dey rait essay, screen raita, pesin wey dey rait drama for stej, pesin wey dey do biznes for online media, an shi dey tok for society mata. Wetin shi dey rait an di drama wey shi dey do na mostly abaut how kolsho an religion no dey mek sense somtaimes. Shi tok sey shi be pesin wey dey supot wumen mata wel-wel an di way shi dey tok for poblik don mek pipu kol ha “fearless feminist for today world”.

How shi tek gro an skul

Joy go sekondri skul for Lagos State Model College for Kankon, Badagry. Leta, shi go stodi Mass Communication for The Polytechnic, Ibadan. Fom dia, shi enta media wok an build ha wok.

Shi don divorce an get two pikin. For one intaview wey hapun for 2016, shi tok sey "shi dey do beta wen shi dey alone."

Wok wey shi don do

Joy na forma Managing Director for Happenings Radio an shi don be editor for Happenings Magazine. Bifor dat one, shi be managing editor for Genevieve Magazine. Shi stat one kain tok-tok grup wey dem kol The Conversation, wey dey focus on tins lik feminism, how pipu dey do wumen, an bad belle wey men get for wumen. For 2016, she even tok for United Nations abaut mata wey concern girl-pikin.

Shi no dey lik how Nigerians dey kari religion for head. Shi tok sey di way pipu dey do religion dey mek dem weak, selfish an mek dem dey bliv wetin no real. Shi tok say religion na jos one way to mek pipu feel okay for short time inside somtin wey no even dey real. Plenti pipu no lik wetin shi tok — one journalist Mark Anthony Osuchukwu even rait article tok sey mek shi mind ha biznes.

For 2014, shi rilis audio series for wumen wey shi kol Tina’s Shoes & Love Issues. For one interview dat year, shi tok sey shi go soon poblish som of ha buks.

For 2016, shi organize one program wey dem kol Gender Equality And The Funk of Feminism. Dem tok abaut how wumen fit rish dia ful potential. Wen shi dey tok abaut wetin push ha to rait ha play Stori of my Vagina (2016), shi tok sey “wumen neva gree chenj fom di old ways wey society put for dia head.” Di stej pley tok abaut tins lik how pipu dey cheat wumen, beat dem for hauz, uze religion against dem, how kolsho dey sopres dem.

For di sem 2016, for UN International Youth Day, Joy tok sey religion, kolsho an mek man dey kontrol evritin na di main cause of poverty for Nigeria. Shi advis yung pipu sey mek dem forget meni tins wey dia papa an mama generation tich dem, bikos if dem stil dey rememba dos tins, dem no go fit go far for laife.

Pipu dey holways kol Joy “modern-day feminist.” One website, Bellanaija, even tok sey shi dey trai hep wumen chenj how dem ci demselv for dis society. Shi kon also tok abaut feminism for Harvard University.

Shi tok against do kain song wey Nigerian musicians dey sing, espeshialy how dem dey tok abaut wumen lik say dem be sumtin wey pesin fit buy wit moni to sleep wit dem. Shi tok say na dis kain mindset dey mek pipu ci wumen as pesin wey lik money an tins tu much.

For 2017, Joy advis pipu wey don mari wumen for Nigeria say mek dem no gree for eniman wey no value dem. Shi tok sey di promise wey dem mek for marej no sopos kom bifor dia safety an happiness.

Akordin to The Guardian, her play Marriage Onions In Wedding Blues (2017) na stej drama wey trai ansa meni wahala wey women wey don mari dey fez — lik how hosband family dey put mouth for marej an how society dey expet wuman to holways dey do certain tins bikos shi be waif. The play hapun for Freedom Park, Lagos, on March 5, an Nollywood aktors lik Osas Ighodaro an Damilola Adegbite akt for am.

For 2019, Joy poblish one buk wey shi kol Las Las, We'll Be Alright. Di buk be lik guide wey shi tek tok abaut ha own opinion as social an kolsho critic — how Nigerians dey behav, lie, an wetin dem biliv.

Bikos of the kain katakata topik wey shi dey holways tok an how shi tek understand feminism, meni pipu don tok bad tins abaut ha. Pipu lik Adegoke Adeola (media person from Ogun State Broadcasting Corporation), felo feminist Omotoyosi Ogunbanwo, an Uchegbu Ndubuisi (lekturer for University of Nigeria) don tok abaut ha.

For 2021, one Instagram blogger wey dem kol GistMerchant kol ha out for mata wey concern Grace Osei, one wuman wey Interpol dey faind for fraud kase.